Israel-in lunga mi vawm ṭhinte hremna tur a pawm

Israel Cabinet chuan police leh public transport-te lunga tawng ṭhinte hremna tur bill siamṭhat chu a pawm.

Justice Minister hlui Tzipi Livni chuan lunga mi tawng ṭhinte hremna tur dan siam hi kum 2014 khan a lo pharh tawh a ni. He danah hian midang tihnat tuma lunga tawng ṭhinte chu kum 20 thleng lung-ina tan tir theihna dan siam a ni a, Parliament pawhin a lo pawm tawh a ni.

Mahse justice minister thar, Ayelet Shaked chuan bill pharh hmasak hi sawiselin, lunga mi ṭawng ṭhinte chunga hremna lekkawh dawn hian midang tihnat tum an ni ngei em tih finfiah a harsa dawn a ni, a ti. Hei vang hian dan hi siamṭhat rawtin, lunga mi tawngtute chu an thil tum finfiah ngai kher loin, pawikhawihtute hi kum 10 thleng tantir theihna dan siam a rawt a, hei hi cabinet chuan a pawmsak ta a ni. Hetihlai hian prosecutor chuan lunga mi tawng ṭhinte hian midangte hliam na tak an tawrh tir a nih loh chuan thla thum aia rei lo tantir an rawt thung.

Palestinian lam chuan he dan siam tum hi a hma aṭangin an lo sawisel tawh a, inthliarna lantirna a ni, an ti. Palestinian Liberation Organisation Delegation hotu, Maen Rashid Areikat chuan, "He dan hi Israel mite chungah an hman ka ring lo a, Palestinian mite chungah chauh an hmang ang," a ti.

Hetihlai hian Pathianni khan New York-a Israel Day parade neih a ni. New York-ah hian kumtin Israel Day parade hi neih ṭhin a ni a, Pathiannia neihah pawh hian mi 30,000 vel telin, New York Governor Andrew Cuomo, Mayor Bill de Blasio leh Israel parliament member ṭhenkhat pawh an tel.

Likud Party MP, Avraham Naguise chuan mi ṭhenkhatin Israel dodal a, tihbo tuma an beih laia Israel ram thlawptu mi tam takte nena kawngzawh ho chu nuam a tih thu a sawi. Pathiannia kawngzawh hi mi ṭhenkhat, Juda ram a din duh lotute'n an lo ti buai a, mahse buaina liantham erawh a chhuak lo.