Africa hruaitute'n Burundi inthlan hun titlai turin an ngen

Burundi President thlanna neih turah President ṭanglai, Pierre Nkurunziza-a'n a term thumna atana chuh leh a tum avangin eptute'n lungawi lohna an lantir chhunzawm zel. Tharum thawhnate a thlen avangin East Africa ram hruaitute chuan inthlan hun hi sawn hla turin President an ngen.

Eptute chuan President-in a term thumna atana chuh leh a tum hi an ram danpui kalh a ni tiin, an pawm loh thu an sawi. Mahse President chuan a President term khatna hi mipuite thlan ni loin, Par­liament-in a ruat a nih avangin term khat dang chu a la chuh thei niin a sawi thung.

East Africa ram hruaitute chuan Burundi tual­chhung buaina thleng mek chu chinfel dan ngaihtuah turin President Nkurunziza hi an ngen a, hei bakah hian boruak ralmuan hun nghak a, June thlaa inthlan neih an tum pawh chu thla khat a sawnhla turin an ngen bawk.

Burundi parliament inthlan hi June 5 hian neih a ni dawn a, President thlanna chu June 26-ah neih a ni ang.

Tualchhung buaina a thlen hnu hian Burundi ram aṭang hian mi 90,000 vel chu an ṭhenawm ramah himna zawngin an tlanchhe tawh a ni. Eptu pawl hruiatu, Pacifique Nininahazwe chuan President Nkurunziza paihthla tur hian nasa zawka nawrh huaihawt zel an tum thu a sawi.