Taliban-te'n Afghanistan-ah police station an bei
Taliban firfiakte'n Pathianni zan khan Afghanistan khawchhak lam, Nangarhar province-a Jalalabad khuaah police station an bei a, mi 19 in hliam an tuar. Police station beitu firfiak pathumte hi police-te'n an kaphlum nghal.
Pathianni zan dar 11.10 vel khan firfiak pathumte hian Fast Reaction Police Forces station hi an bei a, nimin zing lam thleng khan police-te nen an inkap a ni. Police-te hian firfiakte hi kaphlum mah se, an inbeihna avang hian mi 19 in hliam an tuar a, hliam tuarte hi hospital-ah hruai nghal an ni. Hliam tuar zinga pakua chu police an ni a, naupang panga an tel bawk.
Taliban pawl chuan police station beitu an nih thu hi an puang tawh a, April 24-a annual spring offensive an hawn aṭang khan, firfiakte hian Afghanistan ramchhung hmun hrang hrangah pawikhawihna an thlen a ni.