Donald Trump-a'n office a luah hma ngeiin Gaza-a Israel mi hren mekte chhuah turin a vau

US president-elect Donald Trump chuan Gaza Strip-a Hamas-in Israel mi an hren mekte chu President atana lak luh a nih hma ngeia chhuah turin a phut. Chhuah an nih loh chuan an lakah a che na hle ang, tiin Hamas a vau.

Donald Trump hian Truth Social site-ah he thu hi post-in, nakkum Janaury 20, 2025-ah President of the United State office a luah dawn a, hemi hma ngeia Gaza-a mi hren mekte chu chhuah an nih loh chuan Middle East chuan buaina nasa tak a hmachhawn dawn a ni, a ti. He thila mawhphurtute chu US chanchina la hriat ngai loh khawpa nasa in beih an ni dawn tih a sawi zui a, 'Tunah mi hrente chu chhuah nghal rawh u' tiin a tlip zui bawk.

Israel-in Gaza Strip-a Hamas laka beihpui thlak mekah US sipaite tirh luh an nih ve dawn leh dawn loh erawh Trump hian a sawi chiang lo a ni. Trump hian office a luah hma ngeiin Israel leh Hamas hian inkahhai an puan a, mi hren mekte pawh chhuah an nih ngei a beisei a ni.

Israel prime minister Benjamin Netanyahu Office chuan Trump thusawi chungchangah sawi zui a la nei lo a, mahse Israel President Isaac Herzog chuan social media-ah Trump thusawi avang hian lawmthu sawiin, an unau hren mekte pawh an in lamah an haw leh theihna atan an ṭawngṭai reng thu a sawi.

October 7, 2023-a Hamas ten Israel chhim lam an beih ṭum khan mi 1200 vel an thah bakah mi 250 chuang manin an hreng zui a ni. An mi hren zinga mi tlema zawng chu chhuah an ni tawh a, thi eng emaw zat awm tawh bawkin, tunah hian mi 101 vel an la hreng mek nia rin a ni. An zingah hian ram dang mi eng emaw zat an la awm bawk. Thawhṭanni khan Hamas chuan Israel nena thla 14 zet an inbeih chhungin an mi hren zinga 33 chu an thi tawh tih an sawi a, mahse tute nge tih leh, eng ram mi nge tih erawh an sawilang lo.

Notre Dame Cathedral hawnnaah tel dawn

Donald Trump hi December 7, 2024-a Paris-a Notre Dame Cathedral hawnnaah a tel dawn. Hei hi US President atana thlan tlin a nih hnuah ram danga a zin chhuahna hmasa ber tur a ni ang.

Kum 2019-a kangmei chhuakin a tih chhiat ṭhen, Notre Dame Cathedral hi kum nga chuang chei ṭhat hna thawh a nih hnuin hawn a ni leh tawh dawn a ni. A hawnnaah inkhawm buatsaih hi sawm bikte tan chauha tih niin, ram dang hruaitu 50 vel an tel rin a ni.

Trump chuan hmun hmingthang, Notre Dame Cathedral hawnaa tel tura sawm a ni chu lawmawm a tih thu leh, he huna tel ngei tura Paris-a a zin tur thu a sawi. He cathedral ropui tak siamṭhatna kawnga France president Emmanual Marcron hnathawh chu ropui a tih thu a sawi bawk.