Vietnam mi hausa Truong My Lan dilna hnawlsak

Vietnam mi hausa, Troung My Lan-in thi tura hremna pek ngaihtuah ṭha leh tura a ngenna chu court-in a hnawlsak.

Kum 68 mi, My Lan hi khawvela bank-a sum tihchingpenna lian ber thlenga a ruahmantu bera puh niin thiam loh chantir a ni a, thi turin a chungthu relsak a ni. Vietnam danah a sum tih chingpen zinga 75% hi a pe kir leh thei a nih chuan, thi tura hremna pek hi damchhung tang tura tihnep sak a ni thei ang.

Truong My Lan hian an rama bank lian pangana, Saigon Commercial Bank chu a rukin a lo thunun vek a, kum 10 chuang chhungin company lem eng emaw zat hmingin loan leh pawisa fai tam tak a la chhuak a ni. A sum lak chhuah hi USD tld 44 a tling. Prosecutor-te chuan a sum lak chhuah zingah USD tld 27 zet chu dik lo taka a lak niin an sawi a ni. He a thiltih avang hian April thla khan trial court chuan thiam loh a chantir a ni. Thiam loh chantir a nih lai hian real estate firm lar tak, Van Thinh Phat Group chairwoman a ni. Vietnam-a mi pawimawh, a bikin hmeichhia zingah thi tura hremna pek hi an la tam lo hle.