Iran-in Syria sorkar puitu tur thawn

Iran sorkar chuan helpawl nena inbei mek, Syria sorkar puitu Iraqi militia a thawn. Iran president Maodu Pezezhian chuan Syria president Bashir al-Assad pawh biain, helho an beih letna kawngah Iran chuan a theih anga puih zel a inhuam thu pawh a hrilh nghal bawk.

Helpawl, Hayat Tahrir al-Sham hian kar liam ta khan Syria rama khawpui pawimawh, Aleppo chu sipai kut aṭangin an lo la tawh a, Idlib leh Hama province lak leh tumin hma an la mek bawk.

Suria sipaite chuan Hama province hmarlamah hian helpawl lo dang turin an lo inbuatsaih a, Thawhṭanni khan Russia puihna nena helho laka beihpui an thlakah mi 400 an thi niin an sawi. Aleppo, Hamas leh Idlib-ah hel ho hi hual beh an tum a ni.

Syrian Observatory for Human Rights chuan Iran thlawp, Iraq militia mi 200 vel chu Aleppo khawpuiah hian Syria sipaiten helho nawr let an tumnaah an pui dawn niin a tarlang.

Iran leh Russia chuan Syria sorkar chu an thlawp zel tur thu an sawi a, Russia pawhin Syria sipaite hi a pui mek a ni. Russia Parliament, Kremlin thupuangtu, Dmitry Peskov chuan Bashar Assad chu an thlawp zel dawn tih sawiin, Syria ram dinhmun pawh uluk taka an thlithlai reng thu leh, a ṭul dan anga chet pawh an lak tur thu a sawi.