South Korea-ah MERS virus vangin mi pahnih thi tawh

Middle East-a hrileng, Middle East Respiratory Syndrome (MERS) vangin mi ṭhahnem tak an thi tawh a, hetihlai hian South Korea-ah pawh mi 25-in he hri hi an kai tawh tih finfiah a nia, rinhlelh 680-te chu enkawl tura dah hran an ni.

Ministry of Health and Welfare official, Kwon Jun-wook chuan he hri kai 25 zinga mi pahnih- putar kum 71 mi leh hmeichhe puitling kum 58 chuan an thihpui tawh thu a sawi bawk.

China-ah pawh he hri vei hi pakhat hmuhchhuah a ni tawh bawk.

MERS hri hi kum 2012 khan hmuhchhuah a ni a, Saudi Arabia ram aṭanga darh a ni. Hri veite chu hritlang pangngai angin a tirah a lang a, a hnuah khawsik, thawk lama harsatna, pneumonia leh kal ṭha lo thlengin a siam thei a ni. He natna hi mihring taksaa tuihnang aṭangin a darh thei a ni. Kum 2003-a Asia khawmuala mi tam tak thihna thlentu, Severe Acute Respiratory Sydrome (SARS) aiin a hlauhawm nia sawi a ni.

Khawvel pumah MERS vei hi mi 1,167 an awm tawh a, an zinga 497 in an thihpui tawh niin European Center for Disease Prevention and Control chuan a tarlang. He natna hri venna leh enkawlna damdawi hi a awm rih lo a, a vei tawh zinga 41% in a thihpui a ni. MERS natna hri hi camel aṭanga kai nia sawi a ni, Saudi Arabia health official chuan an rama camel awm zinga 90% chuan he hri hi an vei tiin a sawi.