South Sudan-in UN coordinator Toby Lanzer a hnawtchhuak

South Sudan chuan an rama chhawm­dawl hna thawktu, UN Mission in South Sudan deputy head leh humanitarian coordinator, Toby Lanzer a hnawtchhuak.

UN chuan South Sudan sorkar thiltih dan hi a dem thu a sawi nghal a, UN Secretary General Ban Ki-moon chuan sorkar chu a thuchhuah sut leh turin a ngen a, hei bakah South Sudan-a UN hma lakna zawng zawngah thawhpui turin a ngen bawk.

Lanzer hi tualchhung buai thlen mekna, South Sudan ram mipuite chhawmdawl an ngaihzia puangzartu pawimawh tak leh, hmun ralṭi leh kilkhawr zawka chengte himna tura a theih anga hma latu a ni, tiin UN thuchhuak chuan tarlang. South Sudan-a Lanzer-a term hi a tawp hnai tawh a, kar kalta Zirtawpni khan UN chuan a term tawp huna thlaktu atan hian Ghana mi, Eguene Owusu a ruat lawk tawh a ni.

Lanzer hnawhchhuah a nih chhan hi South Sudan sorkar chuan a sawilang lo a, mahse social media kaltlanga thu dik tawk lo thehdarh ṭhinah a lo puh tawh a ni.

Lanzer hian South Sudan ramchhung dinhmun chhiatziate a tarlan nan Twitter a hmang nasa a, follower 12,000 dawn a nei. Hei hi South Sudan sorkar chuan a lawm lo hle nia sawi a ni.

Kum 2011 khan South Sudan hi Sudan aṭangin a indang a, kum 2013 December thla aṭang khan South Sudan President Salva Kirr leh Vice President hlui Riek Machar-a thlawptu sipaite an inbei a, tualchhung buaina thleng avang hian mi sang tel an thih tawh bakah mi 100,000 vel chuan an in leh lo an tlanchhiatsan tawh bawk. UN chuan South Sudan-ah hian muanna sipai 14,000 a dah a, UN camp-a himna zawnga lut mi 130,000 vel an awm mek bawk.

UN Security Council chuan South Sudan-a boruak ralmuang a awm theihna tur daltu leh tichhetute chu blacklist-a dahah a vau a, mahse tun thlengin South Sudan official zingah hrek a la nei lo.