IS-te'n Syria helpawl kut aṭangin ram an lak belh
Islamic State (IS) firfiak pawl chuan Syria rama helho kut aṭangin Turkey ramri bula Aleppo province chhungah ram an lak belh leh.
Al-Qaida firfiak pawl zawmpui, Syria helte hian IS firfiak leh Syria sorkar an bei a, mahse Aleppo province-a an kuta awm, thingtlang khaw pali leh khawpui pakhat chu IS firfiakte hian Thawhlehni khan an laksak a ni.
IS firfiakte hian Iraq leh Syria-ah ram an lak belh zel a, Syria ram zahve deuhthaw chu IS firfiak pawl kutah hian a awm tawh a, Iraq-ah pawh 25% vel an la tawh nia sawi a ni bawk.
Hetihlai hian US kaihhruaiin ṭangrual pawlte chuan helpawl laka hian beihpui an la thlak chhunzawm reng a, US Deputy Secretary of State Antony Blinken chuan thla kaw kalta chhunga Iraq leh Syria rama beihpui an thlaknaah IS fighter 10,000 chuang an thi niin a sawi. He thu hi Thawhlehnia US kaihhruai ṭangrual pawla tel, ram 24-te'n Paris-a summit an neihah a sawi lang.
Egyptian political expert-te chuan kum 2003-a US-in Iraq a run kha Iraq rama IS firfiak pawl lo len chhan leh, Middle East biala buaina a chhuah chhanah an puh thung.
Summit neih hmaa chanchin thar lakhawmtute a kawmnaah, Iraq Prime Minister Haider al-Abadi chuan IS an beihletna kawngah Iraq chuan ṭangrual pawl aṭang hian thlawpna a hmu ṭha tawk lo tih a sawi a, an rama IS-te'n hma an sawn zel chuan khawvel pum hlawhchhamna a tilang a ni, a ti.