MERS vangin South Korea-ah school khar

Middle East respiratory syndrome (MERS) hri leng vangin South Korea chuan venthawn thilah an rama primary school 200 chuang a khar a, public event tam tak a cancel bakah mi 1,300-te chu an dinhmun enfiah turin a dahhrang tawh bawk.

Health official-te chuan nimin khan mi panga chu MERS an vei tih an hmuhchhuah belh tih a sawi a, heng mite nen hian he hri vei hmuhchhuah tawh hi mi 30 an tling tawh a, mi pahnihin an thihpui tawh bawk.

South Korea rama MERS hri leng hi khawvel ram dangte pawh ang ngaihven hle. He hri hi mi pakhat aṭanga darh nia hriat a nih vang leh, a darh chak em avangin ngaihven a hlawh hle. Ram ṭhenkhatah pawh MERS hri hi hmuh ni mah se, SKorea ang hian a darh chak ve lo a ni.

SKorea-a MERS hri vei an hmuh hmasak ber chu May 20 kha niiin, Middle East ram hrang hrang tlawhkuala zin, kum 68 mi taksa aṭanga hmuh a ni. A haw hnuah pawh insawiselna a nei mai lo a, mahse insawiselna a neih hnuah out-patient clinic pahnih leh hospital pahnihah enkawl a ni a, heng aṭang hian he hri hi a darh ta nia ngaih a ni. Health care worker-te chuan an enkawl lai hian MERS vei anga an enkawl loh avangin dahhrang loin, damlo dang zingah an dah a ni. A lak aṭanga hri kai zingah hian damlo a awmpui dangte, a chhungte leh a tlawhtute bakah damdawi-ina thawkte pawh an tel.

Sorkarin primary school a khartir zinga a tam zawk hi Gyeonggi province ami an ni a, he hmun hi hri vei an hmuh tamna bial a ni.