Sudan President atan Bashir lalut

Kum 25 zet Sudan ram hruaitu hna chelh tawh, President Omar la-Bashir chu President atana hneh taka thlan tlin a nih leh hnuin, Thawhlehni khan rinawmna thu tiamtira lakluh a ni.

Sudan khawpui, Khartoum-ah Thawhlehni khan President thar lakluhna inkhawmpui neih a ni a, hetah hian al-Bashir chuan thu sawiin, an rama eirukbo umbo tur leh, ram economy siamṭha tura beih zel a tum thu a sawi. Hei bakah hian helpawl hrang hrangte chu sorkar nena inremna zawnga inbiakna neih an remtih chuan ngaihdam a tiam bawk.

Al-Bashir hian kum 1989 khan tharum thawhna nasa tak hmanga sorkar a paihthlak hnuah thuneihna hi a chang zui. Mahse an rama tualchhung buaina a chhuah laia civil mi tam tak thihna thlengah mawphurtua puhin international war crimes thubuai a nei mek a ni. Ram pakhat hruaitu ni lai mek zingah International Criminal Court-ah thubuai nei awmchhun a ni.