Myanmar helpawlin sipai nena inbiak an duh thu sawi

Myamnar-a helpawl lian tak, Myanmar National Democratic Alliance Army (MNDAA) chuan China ramri bul, Shan state-a sipaite nena kum khat chuang zet an inbeih tawh tih tawp a nih theihna turin, sipai sorkar nena remna kawng zawnga inbiakna nei tura an inpeih thu an sawi.

MNDAA hian nimin, December 4, 2024 khan thuchhuah siamin, sipaite nena buaina leh inhriatthiam lohna awmte chinfel dan kawng zawnga inbiakna nei turin high-level team an tir dawn tih an tarlang. Hemi rual hian sipaite chu boruak leh khawmual aṭanga an beih ṭhin ti tawp turin an phut ve nghal bawk.

"China palaina hnuaiah, Myanmar army nena remna leh muanna a awm theihna tura inbiakna neih chu kan inpeih a ni," tiin, August thla tir lama sipaite kut aṭanga an lak sak, Shan state-a khaw lian tak, Lashio chungchang pawh an sawlang bawk.

Myanmar sipaite bei let tura helpawl pathum intelkhawm, Three Brotherhood Alliance-ah MNDAA hi a tel. Kum 2023, October aṭang khan Shan state-ah beihpui thlakin, China ramri bul hmun eng emaw zat chu sipaite kut aṭangin an laksak tawh.

MNDAA hma hian Three Brotherhood Alliance-a tel, Ta’ang National Liberation Army (TNLA) pawhin China-in inremna a awm theihna tura hma a lak hnuah, Myanmar sipai sorkar nena inbiakna neih an hreh loh thu an lo sawi ve tawh bawk a ni.