South Korea President-in Defence Minister a ruat thar

South Korea president Yoon Suk Yeol chuan nimin khan defence minister Kim Yong Hyun banna thehluh chu pawmsakin, a thlaktu atan four-star general hlui, Saudi Arabia-a an ambassador, Choi Byung Hyuk a ruat nghal.

SKorea President hi talbuai chho hle a, Thawhlehni zana an rama sipai thuneihna sang hmanna tur, martial law a puan chu Parliament-in a hnawlsak avangin darkar ruk hnuah a sut leh nghal a ni. Hetih lai hian eptu party-te chuan President Yoon hi paihthlaka nih theihna turin impeachment motion an pu lut tawh bawk.

President-in martial law a puan avanga buaina an neih mek karah, defence minister Kim Young-hyun chuan nimin khan banna a thehlut a, hei hi President pawhin a lo pawmsak nghal a ni. A thlaktu tur pawh hi a ruat zui nghal bawk a ni. Kim Young-hun hi President hnena martial law puang tura thurawn petu nia sawi a ni.

Eptute chuan nimin zinga Parliamentary plenary session-ah President Yoon lakah impeachment motion hi pu lutin, hei hi Pathianni hmain vote lak a nih rin a ni. An ram danah chuan impeachment motion hi put luh a nih aṭanga dawrkar 72 chhunga ngaihtuah a nih loh chuan hnawl theih a ni. Mahse motion hi hnawla nih pawhin, eptu party-te hian a tharin a pu lut leh thei bawk.

Rorellai party, conservative People Power Party (PPP) chuan motion hi dodal an tum tih an sawi. PPP floor leader, Choo Kyung-ho chuan he motion hnawl a nih theih dan tur hi an ngaihtuah dawn tih a sawi. PPP member-te hian vote lak tur hi an boycott dawn nge, vote lak hunah a motion thlawp lo lamah an vote ang tih an ngaihtuah dawn niin an sawi.

President paihthlakna motion put luh hi tlang tur chuan Parliament member 300 zinga hmun thuma ṭhena hmun hnihin an thlawp a ngai dawn. Eptute hian vote 192 an nei mek a, an motion tlang tur hian rorellai party member ṭhenkhat thlawpna an hmuh tel a ngai. Hetih lai hian PPP member zingah 18 chuan President Yoon lakah an lawm lo a, eptu lam an thlawp mai rin a ni, an thlawp a nih chuan impeachment motion hi a tlang thei dawn a ni.

Parliament-ah impeachment motion hi a tlang a nih chuan, President Yoon hi a thuneihna aṭangin chawlh tir a ni ang, ngaihtuah fel a nih hma chuan prime minister Han Duck-soo chuan president mawhphurhna hi a la ang. Yoon hi paihthlak a ni emaw, a bang emaw a nih chuan ni 60 chhungin President thar thlan a ngai dawn bawk a ni.

South Korea police chuan President Yoon Suk Yeol chu martial law a puan leh, hemi avanga mipuiten lungawi lohna an lantir zui chungchangah an chhui zui dawn nia sawi a ni. President thil tih dana lungawi loin mipuite chuan Nilaini zan khan President office panin kawng an zawh a ni. MP zingah tlemte chauhin military law puan tum a nih thu an hre lawk a, vice defence minister ngei pawhin chanchinthar puan aṭanga a hriat ve chauh thu a sawi.