France PM-in fiahna a paltlang zo lo

France prime minister Michel Barnier chuan Nilaini khan Parliament-ah rin tawk lohna, no-confidence vote hmangin paihthlak a ni. President Emmanuel Macron chuan Prime Minister thar a ruat a ngai dawn a ni.

Parliament lower house, National Assembly-a PM laka no-confidence motion put luh hi left leh right wing-ten an thlawp. Member 577 awmna house-ah motion tlang tur hian vote 288 hmuh a ngaih laiin, Nilainia vote lakah PM duh lotu lamah hian vote 331 a tla a ni. Michel Barnier hian France Prime Minister dinhmun hi thla hnih leh ni 29 chiah a chelh hman a, kum 1958 hnua PM dinhmun chelh rei lo ber niin, kum 162 hnuah no-confidence vote hmanga PM paihthlak hmasa ber a ni bawk.

President Macron chuan prime minister thar tur hi a ruat dawn a, mahse hei hi Parliament member-te chuan no-confidence vote hmang vekin an lo hnawlsak leh thei ang. Hei vang hian President tan pawh member-ten an pawm tlan tur hruaitu thar ruat hi thil awlsam tak a ni dawn lo. PM thar ruat a nih hma chu Barnier hi caretaker prime minister-ah a awm chhunzawm ang.

France President hi a hrana thlan a nih avangin PM kaihhruai sorkar tla mah se a nghawng ve lo a ni. Macron chuan President a nihna aṭanga ban a tum loh thu pawh a lo sawi tawh a, a term hi kum 2027 thleng a ni.