ASEAN minister-ten Myanmar chungchang sawi ho dawn

Southeast Asian regional bloc, ASEAN chuan tun thla tawp lam hian an member, Myanmar chungchang sawi hoin Thailand-ah ministerial meeting an nei dawn.

Indonesia foreign ministry thupuangtu, Roy Soemirat chuan meeting an neih tur thu hi Ningani khan sawiin, kum 2021 February-a sipai chakna hmanga Myanmar civil sorkar paihthlak a nih hnua an ram chhung buaina thleng te, remna leh muanna a awm theihna tura ASEAN-in hma lakna tur point 5 an siam kalpui a nih dante sawi ho a ni ang.

ASEAN hian boruak ṭha a awm theihna atana hma lakna tur point 5 hi kum 2021, April thlaa an siam tawh ni mah se, a taka kalpuina mumal erawh a la awm lo a ni. Myanmar-ah hian sipai leh sipai sorkar dodaltu, helpawl hrang hrangte an la inbei chhunzawm reng a ni.

October thlaa ASEAN Summit neihah khan Myanmar tualchhung buaina chu ti tawp thuai tura ngenin, buaina chhuak vanga harsatna tawkte chhawmdawlna pek thuai an ṭul thute pawh an sawi.