SKorea President-in an party hruaitu manna thupek ti chhuak

South Korea president Yoon Suk Yeol chuan Thawhlehni zana sawi lawk loa an rama sipai thuneihna sang, martial law a puan ṭum khan a party, People Power Party (PPP) hruaitu Han Dong-hoon manna tur thupek a ti chhuak a ni. Hei bakah hian eptu pawl hruaitu leh eptu pawl MP pathum manna tur pawh a ti chhuak tel niin National Intelligence Service deputy director, Hong Jong-won chuan a sawi.

Hong Jang-won chuan President hian martial law chu amah eptute man leh nuaibo remchangah man a tum a ni, a ti.

Mahse martial law a puan hi South Korea Parliament-in a hnawlsak avangin, President hian darkar ruk hnuah a sut leh nghal a ni. President Yoon hian martial law a puan hi sorkar dodaltute do letna leh, North Korea avanga an ram dinhmun him lo siamṭhatna tur niin sawi mah se, eptu lam chuan a thuneihna sawhngheh a tumna niin an sawi thung. Rorellai party member-te pawhin an thlawp lo a ni.

Yoon hi President a nihna aṭanga paihthlak a nih theihna turin eptu lam chuan hma an la mek a, vawiin hian Parliament-ah impeachment motion an put luh chu vote lak a ni ang.

PPP hruaitu, Han Dong-hoon chuan eptuten impeachment motion an put luh hi PPP chuan a thlawp dawn lo tih lo sawi tawh mah se, President-in martial law a puan laiin amah leh MP dangte manna tur thupek a ti chhuak tih hriat a nih hnuah President hi hrem a ngai a ni, a ti. Han chuan Korea ram leh mipuite venhimna turin President Yoon hi ban a ngai tiin a sawi tawh thung. Yoon hi an ram President a nih chhunzawm zel chuan, uchuak taka chein martial law pawh a pawn nawn leh mai a hlauhthawnawm a ni, a ti. Hetiang thil a thleng leh a nih chuan South Korea ram leh mipuite chuan buaina nasa takah a hnuk lut tawh dawn niin a sawi.

Nimin khan PPP MP 108-te chuan National Assembly-ah meeting an nei a, impeachment vote lak tur chungchang an sawi. Vote hi vawiin tlai lamah lak tum a ni a, impeachment motion tlang turin eptu lam hian rorellai party member pariat thlawpna an neih tel a ngai dawn a ni.

President Yoon hi Nilaini zinga martial law hlih a nih thu a puan hnuah mipui hmuhah a la inlan leh lo a, nimina PPP meeting-ah pawh a tel lo. Hetih lai hian eptu member-te chuan President hian Parliament-a kal a tum a nih chuan lo dan an tum a ni. Hei vang hian Assembly speaker pawhin Yoon hi Parliament-ah kal rih lo turin a ti.

Martial law puang tura President hnena thurawn petu, defence minister hlui Kim Yong-hyun chu minister a nihna aṭangin a bang tawh a, mahse prosecutor-te chuan South Korea chhuahsan lo turin an ti. Martial law puan chungchangah hian President Yoon leh midang inhnamhnawihte chu inlakhran tuma puha chhui chiang turin eptuten an phut mek bawk.