Australia-ah misualin synagogue hal

Australia-a Melbourne khawpuia Adass Israel synagoge chu an ram huna nimin zing dar 4 khan misual tu tih hriat lohten an hal. Mi pakhat hliamin, kangmei chhuak hian thil a ti chhe nasa hle.

Synagogue beih a nih lai hian a chhungah zinglam ṭawngṭaina hun hmangin mi tam vak lo an awma, firebomb vawm luh a nih thu an sawi. Anni pawh hmun him lamah an tlanchhe ve nghal a ni.

Prime minister Anthony Albanese chuan Melbourne chhimchhak lam, Ripponlea-a synagogue beih a nih chu na taka a dem thu sawiin, sakhaw hmun pawimawh beih a ni chu a thinrimthlak hle tih a sawi. Juda mite huatna kalpuitute chu enliam mai mai an ni dawn lo, a ti. Synagogue beih a nih chungchang hi Australian Federal Police-te nen pawh an sawi ho tawh thu a tarlang bawk.

Synagogue board member Benjamin Klein chuan in chhung awmte chuan kawngkhar leh tukverh vuak ri an hriat hnuah, inchhunga an thil rawn vawm luh aṭang chuan kangmei hi a chhuak niin an sawi a ni, a ti. Juda pawl hruaitute chuan tun hnaiah Australia ramah Juda huatna thu thehdarh a tam hle a, hei vang hian beih an nih pawh hi mak an ti lo a, hetiang an tawh hun hi a thlen pawh an lo ring lawk niin an sawi.