Imran Khan-a'n rally huaihawt turin fuih

Pakistan prime minister hlui, jail-a tang mek, Imran Khan chuan amah thlawptute chu karleh sorkar laka lungawi lohna lantira rally huaihawt turin a fuih.

Imran Khan hian Ningani khan a X-ah he thu hi tarlangin, December 13-ah Khuber Pakhtunkhwa province khawpui, Peshawar-ah rally hi huaihawt turin a ti a ni. He hmun hi an party, Pakistan Tehreek-e-Insaf (PTI) party in ro an relna hmun a ni.

November 25-ah PTI mi leh sate kawngzawh an huaihawta buaina chhuaka amah thlawptu mi 12 thihna thleng leh, nikum May 9-a buaina chhuakah PTI mi pariat thihna chu chhui chian a phut thu Khan chuan a sawi. Hei bakah an party worker mante chu chhuah vek turin a phut bawk.

"Heng thil phut pahnihte hi tih hlawhtlin a nih loh chuan, December 13 aṭangin civil disobedience movement ṭan a ni ang. Thil pawi zawk a thleng a nih pawhin sorkar chu a mawhphurtu a ni ang," tiin X-ah hian a sawi a ni.

Hetih lai hian Pakistan sorkar chuan November 25-ah PTI mi leh sate kawngzawh an hauihawt avanga buaina chhuakah khan thi an awm lo niin a sawi thung. Nikum May 9-a buaina chhuak pawh, Khan-a thlawptuten sipai hmunte an beih vang a ni tih a tarlang. Khan hi nikum May 9-a buaina chhuak chungchangah mipuite fuihpawrhah puhin Ningani khan thubuai siamsak a ni bawk.