Syria helpawlin Damascus khawpui an la; President Bashar al-Assad a tlanchhia

Syria sorkar laka hel, Islamist Hayat Tahrir al-Sham (HTS) group chuan an ram khawpui, Damascus an la tih an sawi a, president Bashar al-Assad chu Damascus khawpui chhuahsanin hmun him lamah a tlanchhe tawh bawk.

HTS group chuan an ram khawpui chu Bashar al-Assad rorelna aṭangin a zalen tih an puang a, Syria sipai leh security force-te pawh Damascus International Airport aṭangin an inhnukdawk tawh bawk a ni. President Assad bakah a thawhpui mi pawimawh eng emaw zat chuan Damascus hi an tlanchhiatsan nia sawi a ni. President Assad hian thlawhtheihna hmangin Damascus hi a chhuahsan nia sawi a ni a, khawi hmun nge a pan sawichian a la ni lo. Damascus khawpui chhung leh khaw daia Assad thlalak leh limte chu tih chhiat an ni hlawm a ni.

Kum tam tak chhung President Assad kaihhruai sorkar lo thlawp tawhtu, Lebanon helpawl Hezbollah pawhin an mi leh sate chu inhnukdawk turin a hriattir ve nghal bawk.

Syria prime minister Mohammad Ghazi al-Jalali chuan sorkar chu Hayat Tahrir al-Sham kuta thuneihna hlanchhawng turin a inpeih tih a sawi a, President Assad kalna lam chu a hriat bik loh thu a sawi.

US president-elect Donald Trump chuan Syria buainaah US chu a inrawlh tur a ni lo tiin Truth Social-ah a tarlang. Russia foreign minister Sergei Lavroc chuan helhoin Syria rama thuneihna an chan chu phalsak an ni tur a ni lo, a ti ve thung. Russia leh Iran hi Assad kaihhruai Syria sorkar thlawp rengtu an ni a, tun ṭuma Syria tualchhung inbeihna a thlen hnuah pawh Iran ramah Syria sipai sang tel an tlan lut tawh.

President Assad kaihhruai sorkar paihthlatu, HTS hi UN, US, Turkey leh ram dang eng emaw zat chuan firfiak pawlah an lo puang tawh a ni.