Notre-Dame Cathedral hawn a ni ta

France khawpui, Paris-a hmun hmingthang, Notre-Dame Catheral chu kum nga chhung siamṭhat hna thawka khar a nih hnuah, an ram huna Inrinni zan khan hawn a ni leh ta.A hawnna inkhawmah hian ram dang hruaitu eng emaw zat an tel.

Kum zabi 12 hunalai sak, Notre-Dame Cathedral hi kum 2019 khan kangmei chhuakin a tichhe ṭhen a, a siamṭhat hna hi thawh nghal a ni. Cathedral siamṭhatna tura khawvel ram hrang hrang aṭanga sum thawh khawm hi USD tld 1 dawn a tling.

Inrinni zana Cathedral hawnna inkhawmah hian a kan laia a ṭhelh hna thawktu, France kangṭhelhtute zahna lantirin, building hmaah an hnena lawmthu sawina, 'merci' (thank you) thuziak tih lan a ni bawk.

Hawnna inkhawm hi Archbishop Laurent Ulrich-a'n a kaihhruai a, he hun hmanpuitu tur hian France president Emmanuel Marcon chuan ram dang hruaitu eng emaw zat a sawm a, an zingah hian US president-elect Donald Trump, Ukraine president Volodymyr Zelenskyy, Britain Prince William, Italy prime minister Giorgia Meloni te pawh an tel. Donald Trump hi US President atana thlan tlin a nih hnuah ram danga a zin chhuahna hmasa ber a ni.

Notre-Dame Cathedral hi hawn ni tawh mah se,nakkum February 1 aṭangin sakhaw pawl bik, religous group tour chu neih theih a ni dawn chauh a, June 9 aṭang khualzin pangngai tan tlawh theih a ni ang.