South Korea President paihthlak rawtna hnawl

South Korea president Yoon Suk Yeol chuan martial law a puan avanga eptuten Parliament-a paihthlak rawtna, impeachment motion chu Inrinni khan vote lak niin, a tlang zo ta lo.

National Assembly speaker, Woon Won-shik chuan impeachment motion hian thlawptu a ngah tawk loh avangin hnawl a nih thu a puang. Motion thlawp lamah hian vote 195 a tla a, tlang tur hian National Assembly member 300 zinga hmun thuma ṭhena hmun hnih, vote 200 hmuh tlin a ngai a ni.

Eptu lam hian member 192 neiin, motion tlang tur hian rorellai, People Power Party (PPP) member pariat talin an thlawp ve a ngai a ni. Parliament-a vote lak a nih hma hian PPP member ṭhenkhat chuan motion an thlawp rin a ni a, mahse President nupui chhui chiang tura special prosecutor ruat chungchanga vote lak a nih hnua, impeachment motion ngaihtuah hmain PPP member tam zawk chu chamber aṭangin an chhuak a, motion pawh a tlang zo ta lo a ni.

Parliament-a impeachment motion ngaihtuah a nih lai hian pawn lamah mi nuai 1.5 vel chu President Yoon ban phutin an lo pungkhawm bawk. Chamber aṭanga PPP member-te vote thlak lo an chhuah lai pawhin pawn lamah mi sing tel chu Yoon ban phut hian an lo aurual bawk.

President Yoon chuan vote lak hma hian TV-ah thu sawiin, martial law a puan avangin mipui hnenah ngaihdam a dil a, he thil a tihna chhan chu a rilru hah leh mangan vang nia sawiin, mipuite a ṭhawng leh harsatna a thlen chu pawi a ti hle tih a sawi.

Defence minister hlui  Kim Yong-Hyun man

South Korea prosecutor-te chuan nimin, Pathianni khan an ram defence minister hlui Kim Yong-Hyun an man.

Kim Yong-Hyun hi President Yoon Suk Yeol-a'n an ram rorelna, sipai kuta dah theihna tura martial law a puan thut chungchangah thurawn petu nia puh a ni. Parliament-in martial law a hnawl hnuah, kar liam ta Nilaini khan defence minister a nihna aṭangin a bang zui nghal bawk a ni.

Kim hi nimin zing lam khan Seoul Central District Prosecutors Office-ah a inpe a, special investigative team in thu an zawtfiah ang.