Gaza aṭangin rocket-in Israel an kap
Gaza Strip aṭangin Nilaini khan rocket hmangin Israel chhim lam beih a ni a, nimin zing khan Israel chuan chhang let nghalin missile hmangin Gaza City-a a kap let.
Israel indo thlawhtheihna hian Gaza City-a sipai hmun pawimawhte chu air-to-ground missile hmangin a kap a, mahse thi leh hliam an awm hriat a ni lo. Police leh security force-te chuan Gaza-a security headquarters-te chu Israel sipaite an beih leh hlauhthawn vangin building-a awmte pawh an thiarchhuak nghal vek a ni.
Hemi hma hian Gaza city hmarlam aṭangin rocket hmangin Israel hi kah a ni a, rocket-te hi Israel chhim lama Ashkelon leh Netivot khuaa ram ruakah a tla, thiltih chhiat a nei lo nia sawi a ni. Rocket hi Islamic State (IS) firfiak pawl nena inzawm, Islamic Salafist group chuan an kah niin an sawi.
Israel media-te chuan Salafist pawl hi Gaza Strip thununtu, Hamas pawl nen an inmil lo hle tih an sawi a, Hamas-te'n an pawl laka beihpui thlaka an pawl member pakhat an kahhlum avangin an lungawi lo hle tih an tarlang bawk. Kar hmasa khan Salafist pawl hian rocket hmangin Israel hi a lo bei tawh bawk a, hemi chhanletna atan hian Israel chuan Gaza Strip-ah thlawtheihhna hmangin vawi ruk bomb a thlak a ni.
Hetihlai hian Israel Defence Minister Moshe Yaalon chuan rocket hmanga an ram beihnaa a mawhphurtu berah Hamas chu an puh tih a sawi a, Israel ram leh Israel mite tihnat tuma beihna chu an enliam mai mai dawn lo tih a sawi.