Burundi inthlan neih hun sawn

Burundi sorkar chuan tun thla chhunga an ram parliament leh presi­dent thlanna neih tur a rua­hman chu sawnhlat a nih thu a puang.

President thlanna neih turah hian Presi­den ṭang­lai, Pieere NKu­run­­ziza chuan a term thumna atana chuh leh a tum avangin eptu lam chuan danpui kalh a ni tiin an dodal a, vawi tam tak nawrh huaihawtin tharum thawhnate a thleng a ni. Tualchhung buaina thleng vang hian mi 90,000 chuan an ram hi an chhuahsan tawh bawk.

Tualchhung buaina thleng vang hian East Africa ram hruaitute chuan inthlan hun hi sawn hla mai turin an lo ngen tawh bawk.

President thupuangtu Willy Nyamitwe chuan inthlan hun sawn hlat a nih thu hi sawi mah se, a ni tur erawh a sawi lang lo a, election commission-in a puang ang.

Parliament inthlan hi a tira ruahman ang chuan vawiina neih tur a ni a, President thlanna hi June 26-ah neih tura tih a ni bawk.

Danpuiin President hna hi a zawnin term hnih bak chelh theih loh ti mah se, President Nkurunziza-a'n a term thumna chelh tura chuh leh a tum hi Africa rama thil thlengah chuan thil mak vak a ni lo niin zirchiangtute chuan an sawi. Africa ram ṭhenkhat hruaitute hi kum sawm tel ram hruaitu hna chelhin, an dinhmun an chelh chhunzawm theihna atan an ram danpui an siamrem mai ṭhin tiin an sawi. Burkina Faso president, Blaise Compaore chu kum 27 zet President a nih hnuah inthlan chuh leh a tum a, mahse eptute'n an nawrna vangin nikum October thla khan a bang a ni. Zimbabwe President Robert Mugabe pawh kum 1980 aṭang khan President hna hi a chelh tawh a ni.