Lawng chesuala chuang chhungte lungawi lo

China ram Yangtze luia lawng pila chuang chhungte, mi 400 dawn chu lawng chetsualna bulah lungawi lohna lantirin an pungkhawm.

Thawhṭanni khan thli­pui tleh vangin Yangtze luiah hian Eastern Star lawng chu letin a pil a, lawnga chuang mi 456 zingah mi 14 chauh chu him takin an chhuak thei a ni. Lawnga chuangte chhan­chhuah hna thawk­tu tur hi tirh ni mah se, ruahsur avangin an thawk chak thei lo. Lawnga chuang zinga mi 65 chu an thi tih finfiah a ni tawh a, chin hriat lohin mi tam zawk an la awm. Nungdama chhanchhuah zingah lawng captain leh chief engineer an tel a, mahse an pahnih hian man nghal an ni.

Lawnga chuang chhung­te chuan an chhung­te chanchin hriat tum­in hmun hla tak aṭangin an chetsualna bul hnaih an pankhawm a, mahse thuneitute lam chuan an thil hriat duhte an hrilh ṭha tawk lo niin an sawi. Lawng chetsual dan te, rang taka a pil nghal mai dan leh lawnga chuangte inralring tura hriat­tirna a awm loh chhante hriat an duh thu an sawi.