Latvia President atan Raimond Vejonis an thlang

Latvia parliament chuan an ram pre­sident thar atan Defence Minister nilai, Raimonds Vejonis chu Nilaini khan a thlang.

President thar thlanna hi secret voting hmangin vawi nga neih a ni a, a thawh tawpna berah Vejonis thlawptu lamah vote 55 tlain a duh lo lamah vote 42 a tla thung.

Thlan tlin a nih hnuah Vejonis chuan thu sawiin, an ram leh mipuite tana theihtawpa hna thawh chhunzawm zel a tiam. Latvia national security tihchak a, ram hmasawnna chak zawka kalpui a tum thu a sawi.

Vejonis chuan, "Kan ram mipui te, political party, sorkar leh parliament-te lungrual taka kan thawhho theihna turin ka bei dawn a ni. Latvia ram tana thawk thei tura min thlang hi ka tan chuan chawimawina ropui tak a ni," a ti.

Kum 48 mi, Vejonis hi Latvia sorkar hmasaah te pawh chanvo pawimawh tak tak a lo chang tawh a, University of Latvia aṭanga graduate niin, biology-a master degree nei a ni.