SKorea Justice Ministry-in President zin chhuah a khap

South Korea Justice Ministry chuan an ram president, Yoon Suk Yeol chu kar liam taa martial law a puan chungchang chhui chian mek a nih avangin, ram pawn lama a zin chhuah khap a nih thu nimin khan a puang.

President Yoon hian martial law puan chungchangah hian an ram mipuite hnenah ngaihdam a dil tawh a, Parliament-ah eptuten President a nihna aṭanga paihthlak rawtna, impeachment motion an put luh pawh vote lak a nih hnuin hnawl a ni bawk. Mahse an ram sorkar, sipai rorelna kuta hlan theihna tur, martial law a puan thut chungchangah hian chhui zui a ni dawn tho a ni.

Defence Ministry chuan President Yoon hi dan ang takin commander in chief a la ni chhunzawm zel tih a puang bawk a, hetih lai hian a lakah sipai hotu lungawi lo an tam tawh hle. President a nihna aṭanga bang tura nawrna pawh a la awm zui reng bawk.

Corruption Investigation Office for High-ranking Officials hotu, Oh Dong-woon chuan nimina Parliament-a hearing neihnaah, President Yoon hi ram pawn lamah a zin chhuah khap a nih thu a sawi. He panel hi kum 2021-a high-ranking official, President leh a chhungte pawh huam tela chhuitu tura din a ni a, mahse President thubuai siamsak theihna thuneihna erawh a nei tel lo. Hei vang hian prosecutor office lamah an thlen chhawn a ngai dawn a ni.

Martial law puan a nih vang hian President Yoon hnena he dan puang tura thurawn petu, defence minister hlui Kim Yong Hyun chu man a ni tawh a, ani bakah sipai hotu pathum pawh suspend an ni tawh bawk.