Russia-in Syria President Assad leh a chhungte humhimna pe

Syria president aṭanga paihthlak tak, Bashar al-Assad leh a chhungte chu helpawl, Islamist Hayat Tahrir al-Sham (HTS) group in an ram khawpui, Damascus an lak hnuah Russia khawpui, Moscow-ah an tlan chhia.

President Assad hi tlawhtheihna hmanga an ram a chhuahsan thu sawi a nih hnuah, khawi lam nge a pan tih sawi lan a ni mai lo. Mahse nimin khan a chhungte hnena Moscow an thleng ta tih sawiin, Russia sorkar chuan humhimna a lo pe nghal a ni.

Assad leh a chhungte chuanna thlawhtheihna hi helpawlin Damascus khawpui an lak mek lai, Pathianni khan Damascus airport aṭangin a thlawk chhuak a ni. Syria tuipui kam lam, Alwaite bial lam a pan hnuah, a kalkawng a thlak leh thut a, hemi hnu hian an kalna lam chin an hre zui ta lo a ni. A tirah chuan thlawhtheihna hi an kap thla nia ngaihna pawh a awm hman a, mahse nimin khan Moscow-ah him takin an thleng tih Russia news agency-te chuan an tarlang.

Russia hi Assad-a thlawptu nghet tak niin, Syria ramah hian military base pahnih an nei bawk. Assad-a'n thuneihna a chan theihna atana Syria rama tualchhung indona thlengah pawh Russia hi a inrawlh thuk hle nia sawi a ni. Tun ṭuma HTS te an rawn hel thar leh hnuah pawh Russia leh Iran chuan Assad hi an theih angin thlawp mah se, HTS hi an dang thei ta lo a ni.

HTS hian Damascus khawpui an lak hnuah, an pawl hotu lu ber Abu Mohammed al-Golani chuan he khawpuia Umayyad Moque a tlawh a, mi tam takin hlim takin an lo hmuak a ni.