Israel sipaiten Golan Heights-a buffer zone an la

Israel prime minister Benjamin Netanyahu chuan Syria tualchhung buaina a chhuah hnuah, kum 1974-a Syria nena inremna an lo siam tawh anga din, Golan Heights-a buffer zone chu Israel sipaiten a nla tih a sawi.

Prime Minister Netanyahu chuan kum eng emaw zat liam taa inremna an siam tawh chu a chhe ta tih sawiin, Syria sipaite chuan an awmna hmunte an chhuahsan avangin Israel sipaiten an luah zui a ngai a ni, a ti.

Israel hian 1968 Mideast war-ah khan Golan Heights hi lain an luah zui a ni. US tel loin ram hrang hrang chuan Syria ram a luahsakah an puh.

Isreael sipaite chuan Golan Heights bulhnai, Ofaniya, Quneitra, al-Hamidiyah, Samdaniya al-Gharbiyya leh al-Qahtaniyah hmuna Syria mi chengte tan thuchhuah an siam nghal a, Syria sipai leh helpawl Hayat Tahrir al-Sham (HTS) inbeihna thleng avangin Israel Defence Force (IDF) an chet chhuah ve a ngai a,mipuite tih nat an tum lo tih an sawi.

Islamist helpawl, HTS in Syria sorkar an paihthlak tak avangin, Syria ralthuam siamna hmun leh long-range rocket-te chu helpawl kuta a awm hlauthawngin, Israel sipaiten hma an la nghal bawk. Nimin khan heng hmunte hi an kap niin Israel foreign minister Gideon Sarr chuan a sawi. "Kan ngaihtuah ber chu Israel leh Israel mipuite himna a ni," a ti. Israel hian a hma pawhin Syria ram chhunga Iran leh Lebanon helpawl nena inzawmna neite ralthuam dahna hmun nia sawi chu a lo kap fo tawh ṭhin.

Syria sorkar hian kum 2013 khan chemical ralthuam kawl loh a lo remti tawh a, mahse heng ralthuam eng emaw zat hi chu a la kawlruk reng rin a ni tho a ni.