EP-in Shakharov Prize community aṭangin Aung San Suu Kyi paih

European Parliament chuan Myanmar ram hruaitu, Aung San Suu Kyi chu an rama Rohingya hnamte chunga sipaite pawikhawihna thlen a thlawp avangin chawimawina lo dawng tawh "Sakharov Prize community" aṭangin paih a ni tih a puang. 

European Union assembly hian Myamnar ram democracy campaigner hlui, Suu Kyi hi kum 1990 khan human rights chawimawina sang, Sakharov Prize hi a lo hlan tawh a ni. Chawimawina a pek tawh hi sut thei tawh loh mah se, chawimawina dawng tawhtu,"Sakharov Prize commu­nity" aṭangin a paih a ni. 

Kum 2017-a Myanmar sipaiten Rohingya hnam laka beihpui an thlak avangin Rohingya mi nuai sarih chuang chu Bangladesh ramah an tlanchhia a ni. He thil thleng chungchangah hian ram hrang hrangten na takin an sawisel a, UN investigator-te chuan hnam insuat tumna tiin an sawi hial. Mahse Myanmar chuan an puhna hrang hrangte hi a pha a, an ram venhimna tura tih a nih thu leh, Rohingya helho lakah bik beihpui thlak anih thu a sawi thung. Nikkum December thlaa International Court of Justice (ICJ) a thu a sawi ṭumin, Suu Kyi chuan an ram sipaite thlavang hi hauhin, insuat tumna anga puhna chu a pha  a ni. 

Kum thum liam taa Myan­mar sipaiten Rohingya khua, Kan Kya an tihchhiat leh halsak chu nikum khan sorkar chuan official map aṭangin he khua hi a paih tih United Nations chuan a tarlang. 

Myanmar-a Rakhine state leh Bangalesh inrinaa awm, Kan Kya  khua hi kum 2017-a sipaiten Rohingya laka beihpui an thlakna, thingtlang khaw 400 zingah a tel. Mahse sipaite hian he khua hi halin, bulldozer nen an nawr zui a ni. In awmna hmunate chuan sorkar leh sipai building te a awm tawh zawk nia sawi a ni.