MERS chhui turin WHO team in SKorea tlawh dawn

South Korea ramah Middle East Respiratory Syndrome (MERS) hri vei hmuh belh zel an nih vangin a enfiah turin World Health Organization (WHO) investigation team tirh a ni dawn.

South Korea Ministry of Health and Welfare chuan WHO nen an rama MERS hri leng mek chu a rang lama enfiah a, Saudi Arabia rama leng nen a inang em tih enfiah an tum thu a sawi.

Nimin thleng khan SKorea-ah hian MERS hri vei nia rinhlelh enfiah zingah 41 chuan an vei ngei tih hriatchian a ni tawh a, a vei zingah mi 4 in an thihpui tawh bawk.

MERS vei thar hmuh zingah hian kum 45 mi sipai a tel a, hei vang hian a awmna, South Korea leh US sipai awmna air base-a sipai 60-te chu an taksa enfiah tura dahhran an ni.

WHO in a tarlan danin, SKorea-ah hian MERS vei palh theia rinhlelh mi 1,600 vel dahhran an ni a, an zinga a tam zawk chu an chenna inah midang tlawhpawh theih loh tura dah niin ṭhenkhat erawh chu damdawi-inah dah an ni thung.

Kum 2012-a Saudi Arabia rama hmuh, MERS hri hi khawvel pumah mi 1,185 in an vei tawh a, an zinga mi 443 in an thihpui tawh a ni. He natna hri hi ram 20 chuangah hmuh a ni tawh a, a tam ber chu Saudi Arabia ramah a ni.

MERS vei hmuh belh leh an nih tak avangin Seoul mayor Park Won-Soon chuan he hri leng laka hian indo an puang tih a sawi a, hrileng tihrem tumin theihtawp an chhuah dawn tih a sawi. Hri leng vang hian South Korea rama school ṭhenkhat chu khar lailawk a ni bawk a, sorkarin MERS hotline siamin, nitin betu sang chuan an awm.