Mubarak-a thubuai ngaihtuah leh dawn

Egypt President hlui Hosni Mubarak-a chu kum 2011-a amah paithlak tuma nawrh huaihawtte tihhlum an nihna mawhphurtua puh a nih chungchangah thubuai a hmachhawn leh dawn.

Mubarak-a hi eptute tihhlum chungchangah thubuai siamsak ni mah se, court chuan a thubuai hi a tihtawpsak tawh a ni. Mahse a thubuai hi ngaihtuah ṭha leh tura prosecution lamin appeal an thehluh chu pawmin, ngaihtuah ṭhat a ni leh dawn a ni.

Kum sawmthum zet Egypt ram hruaitu hna lo chelh tawh, Mubarak-a hi paihthlak a nih hnuin thubuai hrang hrang siamsak a ni a, a thubuai dangah hian thiam loh chantirin kum thum vel chu lung-inah a tang tawh bawk.

Thla hmasa khan Egypt court chuan Mubarak leh a fapate pahnih chu eiruk thubuaiah thiam loh a chantir a, chhuah lailawk pawh awm loin kum thum tang turin a hrem.