Mauritius President atan Gurib-Fakim

Mauritius Parliament chuan an ram President atan scientist Ameenah Gurib-Fakim-i a pawm a, Mauritius-in President atana hmeichhia a neih hmasak ber tur a ni.

Ningani khan President thar tur hi Parliament-ah hian ngaihtuah a ni a, member-te chuan lungrual takin an pawm a, nimin khan President thar hi lakluh nghal a ni.

Kum 56 mi, Gurib-Fakim hi Centre for Phytotherapy Research (CEPHYR)-a director ni lai a ni. Britian-a Exeter leh Surrey university-ahte a lo zir tawh a, Mauritius University-a organic chemistry-ah a hotu nilai a ni. World Bank leh inter­national institution dangahte a lo thawk tawh bawk.

Mauritius hian kum 1968 khan Britain aṭangin independence a hmu a, Africa ram zinga ram hausa ber pawl leh eiruk tlemna ber zinga mi a ni. A ram mipui maktaduai 1.3 awmin, per capita GDP hi US dollar 9,000 chuang a tling.