Malala-i kaptute chhuah zalenah Pakistan an puh
Kum 2012, October thlaa hmeichhe naupangte lehkha zirtir an nih theihna tura beitu, Pakistan tleirawl Malala Yousafzai-i kaptu, Taliban pawl member 10-te chu an thubuai tihtawpsak nia sawi a ni.
Pakistan sorkar chuan Malala-i thah tumnaa inhnamhnawiha puh, mi 10-te chu kum 25 tang turin an chungthu relsakin jail-a tantir an nih thu a lo sawi tawh a ni. Mahse an zinga pariatte hi vantlang hriat loha an thubuai ngaihtuahnaah an puhna lakah hian fihlimtir an ni a, zalen takin an awm tiin Mirror chanchinbu chuan a tarlang.
Malala Youzafai hi a lu-ah kah a nih hnuin England-a Birmingham khuaa Queen Elizabeth Hospital-ah enkawl a ni a, tun thlengin England-ah hian a la awm chhunzawm.
Pakistan sorkar chuan pawikhawihtute hi thiam loh chantirin hrem an nih thu sawi mah se, mipuite laka dawt a sawi a ni tiin Mirror chuan a tarlang. Pakistan Swat Valley-a police hotu, Azaad Khan pawhin Malala-i beitua puh zinga mi pahnih chauh jail-ah tantir an ni tih a sawi. London-a Pakistan High Commission chuan an zinga pariatte chu an puhnaa finfiahna rintlak a awm loh vangin an thubuai tihtawp sak a ni tih a sawi tih tarlan a ni bawk.