Trump-a'n birthright citizenship tih tawp a tiam

US President-elect Donald Trump chuan US-a lut ram dang mi fa, US-a piang an nih vanga US khua leh tui nihna an neih theih nghalna chu President a nih rualin tih tawp nghal a tiam.

NBC Meet-ah he thu hi Trump chuan a sawi a, "Kan tih tawp a ngai, thil ṭha lo tak a ni," a ti. Hetih lai hian he thil hi kaltlangpui a nih chuan dodalna a tam hle rin a ni a, awlsam taka a tih tawp mai theih pawh a rinawm loh a ni.

Birthright citizenship hmang hian US-a dan loa lut emaw, zin khawthawnga lut pawh, US-a an awm chhunga an fa piang chu automatic-in US citizenship a ni nghal a ni. Hetiang dan hi ram dangah hman vek a ni lem lo a, mahse US-ah hian hun rei tak hman a ni tawh. Hetih lai hian an ram mipui zingah he system hi sawisel an awm ve fo bawk a, American citizen ni tur hian dan khauh zawk siam an duh thute an sawi. Mahse ṭhenkhat chuan Constitution 14th Amendment-ah hei hi pawm a ni tiin, he dan thlak tum hi thil ṭha lo tak nia an ngaih thu an sawi ve bawk.

Trump chuan kum 2021-a Capitol buaina chhuaka inhnamhnawiha puhte chu a ngaihdam tur thu a sawi bawk a, President office a luah ni khatnaa hian thupek eng emaw zat tih chhuah nghal a tum thu saiwin, heng zingah hian economy, energy leh immigration kaihhnawihte pawh a tel dawn tih a sawi.