Syria helpawl hotuin an mi man duh official list ti chhuak dawn

Syria sorkar paihthlathu, Islamist helpawl Hayat Tahrir al-Sham (HTS) hotu Abu Mohammed al-Jolani chuan Syria mipuite tih hrehawm leh nghaisakna kawnga inhnamhnawih, senior official hlui list an ti chhuak dawn tih a sawi.

Abu Mohammed al-Jolani hian a hming tak, Ahmed al-Sharaa tih hmangin Telegram-ah thuchhuah a siam a, "War crime-a inhnamhnawih, senior army leh security officer-te man an nih theihna tur an chanchin rawn sawi thei hnenah lawmman kan pe dawn a ni," a ti. Nimin khan an kuta thuneihna pek a nih dan chungchang pawh prime minister kalchhuak, Mohammed al-Jalali nen an sawidun tawh bawk.

Kum 42 mi, Sharaa chuan, President paithlak tak Bahsar al-Assad-a kaihhruai sorkar hnuaia Syria mipuite tih hrehawm leh nghaisaknaa inhnamhnawih, offcial-te chu hremna pek an hreh dawn lo tih sawi. An tlanchhia a nih pawhin umzui zel a, an tlanchhiatna ramte hnenah an kuta pe tura an ngen tur thu a sawi.

HTS group hian Pathianni khan an ram khawpui, Damascus chu Syria sipaite kut aṭangin an la tawh a, President paihthlak tak, al-Assad pawh a chhungte nen Russia-ah an tlanchhia a ni.

Sharaa chuan President Balshar al-Assad paithlak a nih hnuah Syria ram chu a neitu dik tak, Syria mipuite kutah a awm ta tiin, Middle East pumpui tana thil chhinchhiah tlak leh hriatreng tur a nih thu a sawi. Hetih lai hian HTS hi US, European Union leh Turkey chuan firfiak pawlah an la puang chhunzawm a, human rights group pawhin mihring dikna chanvo palzut nasaah an puh bawk. Hei vang hian HTS kaihhruaia Syria sorkar thar ding tur hi ram dangte hian an pawm dawn em tih a la hriat loh a ni.