Tokyo-ah nau piang an pun theih nan hnathawh hun ti tlem

Tokyo Metropolition Government chuan an rama nau piang thar an tlem zel a ziaawm theihna atan, nakkum aṭangin an hnuaia hnathawkte tan hna thawh hun tih tlem a tum.

Tokyo governor Yuriko Koike chuan an policy thar hi tlangzarhin, nakkum April thla aṭangin kar khata hna thawh hun hi ni li ah tih tlem tum a ni tih a sawi. He policy hnuaiah hian thawktute chuan kar khatah ni thum chawlh an la thei zel dawn a, hei bakah elementary school zirlai naupang nei nu leh pate chuan an hlawh tlema tihniamin, working hour an ti tlem thei bawk ang.

Japan ramah hian kumtinin nau piang an tlem zel a, an ram mipui an ral lohna tura nu pakhatin nau a hrin zat hi 2.1 a tlin a ngaih laiin, nikumah nau piang rate hi 1.2 chauh a ni pha. Sorkar department hrang hrangten nau piang an pun theihna turin theihtawpa hma an la chungin, kum 2023-a Japan ram pumpuia nau piang awm zat chu 727,277 a ni.

Mithiamte chuan Japan rama hna an thawk nasa leh, working hour rei lutuk hi hmeichhe tam takin fa neih a, chhungkaw din an peih lohna pakhat niin an ngai. Hei vang hian Tokyo pawhin he policy thar hi duangin, hemi hmang hian thawktute chuan chhungkaw tan hun tam zawk an hmang thei dawn a ni. Ram dangah pawh kar khatah ni li hnathawh hun atana siam hi enchhin an lo ni tawh bawk.