Haiti-ah dawi thil hmanga puh mi 110 that

Haiti khawpui, Port-au-Prince ah gang member-ten dawi thil hmanga puh, mi 110 an that niin human rights group, National Human Rights Defence Network (RNDDH) chuan a tarlang. An mi thahte hi a tam zawk chu kum upa lam, kum 60 chung lam an ni.

RNDDH chuan gang leader hian a fapa dam lo leh, a hnuah a thih zui chungchangah voodoo puithiam a rawn a, a ni hian a fapa dam loh chhanah tualchhunga kum upa zawkte chu puhin, dawi lam thil an hmang niin a lo puh a ni. Hemi hnu hian gang member-te hian heng mite hi an that zui ta a ni.

Voodoo puithiam thusawi avang hian gang member-te hian Wharf Jérémie area-a cheng, kum 60 chung lamte chu man khawmin, an awmkhawm chu silaiin an kap a, a ṭhen chu chemin an vit hlum bawk. He thil an tihna hmun hi Cite Soleil hmunah niin, kawtthlerahte taksa bung, kang bang hmuh turte pawh a awm nual niin tualchhung mite chuan an tarlang.

RNDDH chuan gang member-te thah tuma an man khawmte hi kum 60 chung lam vek an nih laiin, an mi mante chhan tuma kal kum naupang zawk ṭhenkhat pawh an thah zingah hian an tel niin a sawi. Heng mite that tura thupe tu ber chu an leader, Monel Felix, Mikano tia hriat bawk a nih thu an sawi a ni.