Turkey ram inthlanpui neih a ni

Turkey Parliament inthlan chu nimin khan neih a ni a, nimin zing dar 8 aṭanga khan vote thlak ṭanin tlai dar 5-ah khar a ni.

Vote nei mi maktaduai 53.7 chuang awmin, Parliament member 550 an thlang chhuak dawn a ni.

Inthlanah hian political party 20-in an chuh a, candidate 9,861 an awm. Independent candidate 165 an awm bawk. Sorkarna siam tur chuan parliament seat awm zat aṭanga hmun thuma ṭhena hmun hnih, seat 367 chin neih a ngai dawn a ni.

Kum 2011 inthlanpuiah khan President Recep Tayyip Erdogan-a party AKP chuan seat 311 a la a, Republican People's Party (CHP)-in dawtin seat 125 a la a, MHP-in 52 a la a ni. Tun ṭum inthlan dawna mipui ngaihdan lak hnuhnung berah pawh AKP hian hma a la hruai fal hle a ni.

Kum 1924 aṭang khan Turkey hi parliamentary system hmanga ro inrel a ni a, President hian a hming chauhin thuneihna a nei. Hei vang hian President hnena thuneihna sang zawk pek a, an ram rorelna chu presidential system-ah thlak a nih theihna turin ram danpui siamṭhat tumin AKP hian a bei mek a ni. Mahse eptu lam chuan presidential system hman chu an ram democracy-in a chhiat phah an hlauh thu sawiin, an dodal thung a ni.

President Recep Tayyip Er­do­gan hi Prime Minister a nih laia room 1,150 awm theih­na pre­sidential palace a sak chung­changah sawisel a tawk nasa hle a, in sakna atana sum senso hi a hautak bakah sorkarin ram a humhalh mekah dan loin a sa nia puh a ni. President atana thlan a nih hnuah in tharah hian Erdogan hi a lut a, presidential palace hlui chu Prime Minister luah tura dah a ni ta zawk a ni.