SKorea-ah MERS vei hmuh belh
South Korea ramah nimin khan Middle East Respiratory Syndrome (MERS) hri vei thar mi 14 hmuhbelh an ni a, Inrinni zan khan MERS vei zinga pakhat a thi a, he hrileng vanga thi panga-na a ni.
MERS vei mi 14 hmuh belhte nen hian SKorea-ah he hri vei finfiah tawh hi mi 64 an tling tawh a, hetihlai hian an hriselna enfiah turin mi 1,820-te chu dahhran mek an ni bawk.
Acting Prime Minister Choi Kyung-Hwan chuan an rama MERS hri leng mek khuahkhirh turin sorkarin theihtawp a chhuah dawn tih a sawi a, mipuite chu chiai lo tura chahin, a hri vei finfiah tawhte chu damdawi-in enkawl mek an ni, a ti.
Sorkar chuan hri vei finfiah tawh enkawl mekte hi uluk takin a thlithlai zui reng dawn a, enfiah tura dahhrante pawh an awmna chin a chhui zel dawn tih a sawi.
Hetihlai hian MERS veite enkawlna damdawi-in hming hi sorkarin a puangzar lo a, hei hi mipui lamin an sawisel a, hei vang hian nimin khan Choi chuan sorkarin MERS veite enkawlna tura damdawi-in a thlan chhuah hming 24 chu a puang a, a tam zawk hi Seoul leh Gyeongi province ami an ni.
Seoul-a Samsung Medical Center-ah chuan hri vei hi 17 hmuh an ni tawh a, hei vang hian he damdawi-ina damlo enkawl mek 890 leh a thawktute chu enfiah an ngai dawn tiin hospital president Song Jae-Hoon chuan a sawi. Seoul city mayor, Park Won-Soon pawhin he damdawi-in hi a lun hle a, ni khatah damlo mi 8,000 chuangin an tlawh ṭhin avangin damdawi-in aṭang hian hri hi a darh chhuah a hlauhthawnawm thu a sawi.