Sudan President-in a minister turte a puang

Sudan President term nga-na chelh tura lakluh thar, Omar al-Bahsir chuan kar kalta Inrinni khan sorkar thara minister chanvo pawimawh chang turte a puang.

Al-Bashir hian a vice president atan Bakir Hassan Saleh leh Hassabo Mohamed Abdul-Rahman-te a hmang zui leh a, foreign minister atan Ibrahim Ghandour ruatin, acting defence minister-ah Lieutenant-General Mostafa Osman Abeed ruat a ni bawk.

Kum 71 mi, Sudan President al-Bahsir hi rorellai, National Congress Party chairman a ni a, April thlaa President thlanna neihah khan hneh taka thlan tlin niin, vote tla aṭangin 94.5% a hmu a ni. Mahse he inthlan hi eptu party liante chuan an boycott.

Kum 2003 khan Sudan ram khawthlang lama Darfur bialah inlakhran duhte chu sorkar lakah an hel a, hel leh sorkar inbeihna vangin mi 300,000 chuang an thi tawh a, mi maktaduai hnih vel hmun him lamah an tlanchhe tawh bawk. Kar kalta Thawhlehnia President atana lakluh nawn leh a nih ṭum khan, al-Bashir chuan helte chu remna a awm theihna tura inbiakna nei turin a sawm a, ngaihdam an nih tur thu a sawi nghal bawk.