Israel-in Gaza Strip a bei zel

Israel chuan Palestinian helpawl, Hamas-te thunun mek, Gaza Strip aṭanga rocket hmanga a ram chhim lam kah a nih leh avangin nimin khan Gaza Strip hi an bei let ve nghal a, mahse thi leh hliam an awm hriat a ni lo.

Palestinian helhoin Israel chhim lam, Ashkelon-a rocket an kah hi ram ruakah a tla a, thil tihchhiat a neih loh bakah, hliam tuar an awm lo niin Israel sipaite chuan an sawi.

Israel sipai thupuangtu chuan Gaza Strip an kah hian hmarlama helho hmun pawimawh an bitum chu an kap fuh niin a sawi.

Jihadist Salafi group, 'Omar Brigades' chuan Ashkelon kaptu an nih thu an sawi a, a hma pawhin Israel hi an lo kap tawh tih an sawi bawk. Israel an beih chhan chu Israel ram jail-a tang mek, Palestinian mite an thlawpzia an lantirna a ni tih sawiin, "Kan damchhung chuan Juda-te hi thlamuang leh him takin an awm bik lo ang," tiin an tarlang.