Lawng pila thi 431 an tling tawh

China ram Yangtze luia lawng chesuala chuangte ruang chu hmuhbelh zel a ni a, nimin thleng khan thite hi mi 431 an tling tawh a, chin hriat lohin mi 11 an la awm.

Kar kalta Thawhṭanni zana Hubai province-a Yangtze luia chesuala pil, 'Eastern Star' lawngah hian mi 456 an chuang a, an zinga 14 chauh an dam chhuak a, lawng captain leh engineer pawh an tel a, anni pahnih hi man an ni tawh.

Thuneitute chuan chhanchhuah hna thawktute'n lui chhunga lawngah hian ruang an hmuh tawh loh vangin chin hriat loha awm, mi 11-te pawh nungdama hmuh beisei an ni tawh lo tih an sawi.

Hetihlai hian lawng chesuala chuang chhungte chuan lawng chetsual dante, chhanchhuah hna thawh a nih danahte sorkarin chanchin a hriattir ṭha tawk lo tia sawiin an lungawi lo hle a, sorkar chuan a mite chu hmelma ang maia a en nia an ngaih thu an sawi.

Eastern Star hi feet 76-a sei, tone 2,200-a rit a ni. Khualzin 405 leh thawktu 46 bakah travel agency-a thawk mi panga phurin, Nanjing aṭanga Chongqing pana a kal laiin a chesual ta a ni. He lawng neitu hi Chongqing Eastern Shipping Corporation a ni. Lawng chetsual chhan hi hriatchian a la ni lo a, mahse lawng chuang zinga ṭhenkhat chuan thlipui na tak thawk vangin a let a, a pil zui ta niin an sawi.