Israel defence minister-in Inthlan ṭhat a thlawp

Israel prime minister Benjamin Netanyahu kaihhruai ṭangrual sorkar-a Likud Party thawhpui lian ber, Blue and White party hotu leh defence minister Benny Gantz chuan an party chuan inthlan ṭhat buatsaih a nih theihna atana Parliament ṭhiah a thlawp thu a sawi. 

Ṭangrual sorkar siamah hian an term chhungin Netanyahu leh Gantz-te hi Prime Minister dinhmun inchelh chhawk turin an inrem a, Netanyahu hi PM ni hmasain, an term chanve an hman hunah Gantz hi PM a ni ve leh dawn a ni. 

Mahse sorkarin 2020-2021 budget a pawm mai loh avangin Gantz hi a lungawi lo hle nia sawi a ni. PM Netanyahu chuan kum thar lama pawm tura tihkhawtlai a duh laiin, Gantz chuan budget hi pawm nghal a duh thung a ni.  

Sipai hotu hlui, Gantz chuan public service-a chanvo pawimawh ruatna tur tifel duh lohah Netanyahu hi puhin, mipuite hnenan dawt sawiah a puh a, hei bakah hian state budget pawm theih mai tur pawh a tikhawtlai lui a, midangte hlawhtlinna chu aman hmingṭhatna  atana lo hmangah a puh bawk. 

Inthlan ṭhat buatsaih a nih theihna tura Parliament ṭhiah rawtna bill  hi eptu hruaitu, Yair Lip-a thehlut a ni. Gantz chuan bill a thlawpna chu  PM hian state budget pawm nghal a remtih chuan a hnukdawk leh nghal ang tih a sawi. 

Parliament-ah Yair Lip bill thehluh hi a tlang chuan inthlan ṭhat buatsaih a ngai dawn a, kum hnih chhunga Israel rama inthlanpui buatsaih ṭum lina a ni dawn a ni. 

Netanyahu chuan Yair Lip chuan a duh dan danin Blue and White party chu a hnuk kual niin a puh let ve thung a, an rama hripui leng vanga harsatna hrang hrang an tawh mek laia inthlan lo buatsaih chu an pawiti lo a ni, a ti. Blue and White party chu ṭangrual sorkara tel reng chung siin inremna an siam tawh kalh zawnga cheah puhin, insiamṭha turin a ngen nghal bawk.