SKorea Police-ten President office an dap; President paihthlak rawtna thehlut leh

South Korea police-te chuan an ram president Yoon Suk Yeol-a'n sipai thuneihna sang hmanna tur, martial law a puan an chhuina kal zelah, nimin khan Seoul-a President office an dap.

Police-ten President office an dapna chhan ber hi martial law a nih chungchangah eng ang takin nge hma a lak dan leh, a chet dan hi helna a ni thei em tih an chhuina atan a ni. Sorkar leh thuneitu laka hel leh, buaina chawk chhuak tuma puhna hi thu tlingah an ngaih chuan, he thubuai lakah hian President hi humhim theih a ni lo a, thi tura hremna thlenga pek theih a ni ang.

Special investigation unit chuan presidential office leh agency dang an dap thu hi sawiin, 'Special investigation team chuan presidential office bakah National Police Agency, Seoul Metropolitan Police Agency leh National Assembly Security Service te an dap a ni," a ti.

Prime minister Han Duck-soo chuan kar liam taa President-in martial law a puan khan dan tuma hma a lo lak loh avanga a inthiam loh thu a sawi.

Martial law puang tura President Yoon hnena thurawn petu nia sawi, defence minister hlui Kim Yong-hyun chu kar liam ta Nilaini khan man a ni tawh a, Pathianni khan Seoul-a detention centre-ah dah niin a tanna hmunah hian intihhlum a tum a, mahse an chhan hman. Official-te chuan uluk taka ngaihven zui reng niin a a ngaihtuahawm lo niin an sawi. Kim hi bual-inah lo inawhhlum a tum nia sawi a ni a, mahse prison offier-ten an hmu hman a ni. Kim hi December 3-a President Yoon-an martial law a puan kaihhnawiha man hmasak ber a ni.

Eptu party lian ber, Democratic Party chuan President Yoon paithlak rawtna, impeaction motion chu Parliament-ah an thehlut leh. Eptute hian President Yoon laka impeachment motion hi an lo pu lut tawh a, kar liam ta Inrinni khan Parliament-ah ngaihtuah a ni. Mahse rorellai party member-ten vote lakna an boycott avangin President paihthlak rawtna motion hi a tlang zo ta lo a ni. Thawhlehni khan lawmker-te chuan martial law case puan a nih chungchang chhui chiang tura special counsel ruat tura rawtna theh luh chu an pawm.

Hetih lai hian National Assembly kawtah mi tam tak pungkhawmin, an ram President Yoon chu paihthla turin an la nawr chhunzawm zel. Pungkhawmte hian pawikhawihtu Yoon Syuk Yeol chu paihthlak a ni ngei tur a ni, tih thuziakte an keng. Mipui thinrimin rorellai MP office ṭhenkhat pawh an suasam tawh bawk.

President Yoon chu a chungchang chhui chian a nih chhung chu ram danga a zin chhuah khap a ni tawh a, hemi hnu hian top official ṭhenkhat pawh South Korea an chhuahsan khap a ni bawk. An zingah hian Korean National Police Agency-a commissioner general Cho Ji-ho pawh a tel.