Myanmar-ah AA in Maungdaw khua an la

Myanmar-a chi bing pawl chak tak, Arankan Army chuan Rakhine state hmarlama khaw pawimawh tak, Maungdaw khuaa army outpost chu Thawhlehni khan sipaite kut aṭangin an la fel tih an sawi.

Arakan Army hian Maungdaw khuaa outpost an lak leh tak avang hian Bangladesh ramri, km 271-a thui chu an thununna hnuaiah an dah tawh a ni.

AA thupuangtu, Khaing Thukha chuan Maungdaw khuaa army outpost an lak hnuah, outpost commander Brig. Gen. Thurein Tun tlanchiat tum chu an man tih an sawi bawk. He hmun an lak hnuah Naf luia lawng hmanga veivah chu an titawp tih an sawi bawk. Hei hi police leh tualchhunga Muslim awm, Myanmar sipai thlawptute chu lawng hmanga Bangladesh lama tlanchhiat an tum vang a ni.

Rakhine community military wing, Arakan Army hi kum 2009-a student activist hlui, Twan Mrat Naing-a'n a din a ni. Myanmar hmarlama Kachin Independence Army an bel a, a tir lama an fighter-te hi lunghlu khura thawk an lakte an ni hlawm. Kum 2019 khan Independence Day-ah Rakhin state-ah police station pali an bei a, hei vang hian Aung San Suu Kyi chuan helte bei tur hian sipaite pawh thu a lo pek phah a ni. Mahse a hnuah inkahhai an puang leh a ni.

Sipai sorkar a din hnuah hian sipaite hi an bei let leh a, nikum November thla aṭang khan nasa taka beihpui thlak chhoin, Rakhinte-a township 17 zinga 11 chu sipaite kut aṭangin an la tawh.