Republican lamin Biden a nominee an duh lo

US President-elect Joe Biden-a'n Director for Office of Managmenet and Budget atana Indian-American Neera Tanden a rawtna chu Republican senator langsarten an duh lo hle. 

Neera Tanden hian  Senate member tam tak chungchang ṭawngkam huatthlala leh ngeiawm tak tak a lo sawi tawh avangin senator ṭhenkhat chuan he dinhmun chelh tur  hian an duh lo a ni. 

Kum 50 mi, Tanden hi Senate in a pawm a nih chuan Indian-American leh mi ngo ni lo zinga Office of Management and Budget (OMB) hotu ni thei hmasa ber a ni ang. 

Senate India Caucus co-chair, Senator John Cornyn chuan Tanden chu Biden-a'n nominee a siam tawh zinga la ṭha lo ber a ni tih sawiin, ṭawngkam mawi lo tak taka Senate member-te chungchang a lo sawi ṭhin avangin President-elect in a rawtna hi pawmsak pawh a harsa dawn hle a ni, a ti. Cornyn chuan Tanden hian Biden-a'n OMB hotu atana a nominate dawn vang hian Senator leh Republican lam a sawiselna, a twitter-a a lo post tawh 1,000 chuang zet chu a paih niin a sawi bawk. 

Hetih lai hian Demo­cratic senator ṭhenkhat chuan Tanden nomination hi an thlawp thu an sawi thung. Senator Mazie K Hirono chuan a hnathawh tawh leh a tawnhriat lo neih tawhte aṭangin Tanden hi OMB hruaitu tlak a ni tiin a sawi. Joe Biden hian nakkum January 20-a US President thar atana lakluh a nihna tur buaipuitu, member pali awmna Presidential Inaugural Committee (PIC) member atan Indian-American Maju Varghese a ruat tel bawk. 

PIC member atana ruatte chu -Chief Executive Office atan Tony Allen, Executive Director-ah Maju Varghese, Deputy Executive Director-ah Erin Wilson leh Yvanna Cancela te an ni.