Syria caretaker Prime Minister tur ruat

Syria-a Islamist helpawl, Hayat Tahrir al-Sham (HTS) chuan an ram president Bashar al-Assad leh a kaihhruai sorkar an paihthlak hnuah, an ram hruaitu hna lo chelh lailawk turin, caretaker prime minister atan Mohammed al-Bashir an ruat. March 1, 2025 thleng he dinhmun hi a chelh ang.

HTS hruaitu, Abu Mohammed al-Jolani chuan prime minister kal chhuak, Mohammed al-Jalali hmuin, thuneihna inhlanchhawn chungchang hi a lo sawipui tawh a ni.

Syria caretaker prime minister atana ruat, kum 41 mi Mohammed al-Bashir hi politician niin, engineering, law leh adminstrative planning lamah thiamna ṭha tak nei a ni. Electrical leh electronic engineering-ah degree neiin, kum 2007 khan University of Aleppo aṭangin specialised in communications degree a nei bawk. 2010-ah Ministry of Education hnuaiah English language course a zir a, 2021-ah University of Idliba aṭangin Sharia leh law-ah degree a nei bawk. HTS hnuaia rorelna an din, Syrian Salvation Government-a Shura Council chuan kumin January thla khan prime minister atan an lo thlang tawh bawk a ni.