UK-in Pfizer-BioNTech vaccine a pawm Kar leh aṭangin a semchhuak nghal dawn

Britain sorkar chuan Pfizer-BioNTech COVID-19 vaccine chu a pawm tih nimin khan puangin, khawthlang ram zinga Covid-19 vaccine pawm hmasa ber a ni. Kar leh aṭangin an ram mipuite hman turin a chhawpchhuak nghal dawn a ni. 

Pfizer-BioNTech hian a vaccine siam hi enchhinna neihah 90% chuang­in a rintlak tih a tih puang a ni. Britain sorkar chuan Medicines and Healthcare products Regula­tory Agency (MHRA) rawtna angin Pfizer-BioNTech COVID-19 vaccine  chu a pawm tih nimin khan a puang a ni. Sorkarin vaccine committee a lo din tawh chuan Pfizer vaccine pek hmasak tur list hi a buaipui dawn a, pek hmasak tur zingah hian health and care staff, kum upa zawk leh Covid-19 kai awlsam zual bikte dah an ni. 

UK health secretary Matt Hancock chuan vaccine semchhuah programme hi kar leh kartir lam aṭangin kalpui ṭan nghal a ni dawn tih a sawi a, ram chhunga hospital hrang hrang pawh vaccination programme kalpui tur hian an inbuatsaih vek tawh tih a sawi. Pfizer chuan Britain sorkarin emergency atana hman tura an vaccine siam a pawmsak ta chu lawmawm a tih thu sawiin, hei hi Covid-19 hri leng dona kawnga thil chhinchhiahtlak tlak a ni tih a sawi.