MERS vangin school 2,000 dawn khar a ni

South Korea ramah Middle East Respiratory Syndrone (MERS) vei hmuhbelh zel an ni a, nimin khan hri vei mi 23 hmuhbelh leh an ni.

Saudi Arabia bakah SKorea hi MERS hri len nasatna ram a ni a, a hri vei finfiah tawh hi mi 87 an tling tawh a ni. Kum 2012-a Saudi Arabia rama MERS hri leng hmuh a nih aṭangin mi 1,000 chuangin natna hri an kai tawh a ni.

Hri vei thar hmuhbelh zel a nih avangin South Korea chuan venthawn thilah an rama school 2,000 dawn a khar tawh.

MERS vei thar hmuhbelh mi 23 zinga 17-te chu Samsung Medical Center, Seoul-a a hri vei enkawl lai aṭangin an kai tih Ministry of Health and Welfare chuan a tarlang. Samsung Medical Centre-a hri vei awm zat hi 34 an tling tawh a, MERS vei enkawlna dang Pyeongtaek hospital-ah chuan hri vei mi 37 an awm bawk.

Health lam thuneitute chuan hri darh mekna damdawi-in tlawhtute chu in report tur leh, an taksate enfiah tura dahhran phawt turin a ti a, hei bakah hian damdawi-in dangte pawh tlawh lo turin a ngen nghal.

MERS hi kum 2003-a hri leng, mi 770 chuang an thihna thlentu SARS virus nen a inang deuh a, corona-virus niin, thawk lamaah harsatna a siam a ni. He hri laka invenna tur, vaccine a la awm lo a, health expert-te chuan boruak aṭanga kai theih a ni lo a, a vei tawhte nena taksa a intawh aṭangin a darh thei niin an sawi.