Egypt President-in police-te vangin thupha a chawi

Egypt President Abdel Fatah el-Sisi chuan mihring dikna chanvo palzut zawnga an ram police-te chetna avangin thupha a chawi.

Pathiannia thu a sawiah, Sisi chuan, "Police kut tuar tawh, Egypt mipuite chungah ngaihdam ka dil a ni," a ti. Hemi rual hian police-te chetdan rawng tak thleng ṭhin vanga buaina an neihte chinfel dan tur erawh a sawilang lo.

Kar hmasa khan lawyer pakhat chu police officer-in kut a thlak a, hei hian sawisel a hlawh hle a, Egypt rama lawyer-te chuan lungawi lohna lantirin ram pumah nawrh an lo huaihawt tawh a ni.

Sipai chakna hmanga Egypt President Mohammed Morsi paihthlak a nih hnuah police-te hi Morsi-a thlawptu chunga rawng taka cheah puh an ni fo a, civil mite thata police-te puhna thubuai pawh court-ah eng emaw zat a lut a ni. Mahse kum 2011-a nawrh huaihawt zinga mi eng emaw zat tihluma puh, police 100-te chu court-in thiam a chantir a, anni bakah hian he pawikhawihnaa mawhphurtua puh Interior Minister hlui Habib al-Adly leh sorkar mi pawimawh dangte pawh thiam chantir an ni bawk.